Mar 3 | HMO | STEP | Iesu dubu lalonai ia raka vareai lou, unuseni be imana ia dika tauna ta ia noho.

Mark 3

Imana ia dika tauna Iesu ese ia hanamoa

1 Iesu dubu lalonai ia raka vareai lou, unuseni be imana ia dika tauna ta ia noho. 2 Vadaeni, tau haida ese Iesu idia itaia namonamo. Bema hanamoa kara ia karaia Sabati Dina neganai, idia ese ia do idia samania. 3 Iesu ese unai imana ia dika tauna ia hamaoroa, ia gwau, “Oi toreisi, oi mai.” 4 Iesu ia nanadaia idia dekenai, ia gwau, “Taravatu be dahaka? Kara namo ita karaia Sabati Dina neganai, o, kara dika ita karaia? Ta ita hamauria o ita hamasea?”

To idia be hereva lasi. 5 Mai badu bona lalohisihisi danu ia itadia, badina edia lalona be auka. Ia ese gorere tauna ia hamaoroa, ia gwau, “Oiemu imana oi abia isi.” Ia abia isi, vadaeni iena imana ia namo lou, imana kahana bamona. 6 Nega tamona Farisea taudia be murimuri dekenai idia lao, bona Heroda ena kahana taudia danu idia herevahereva, Iesu idia alaia mase dalana idia tahua.

Gorere taudia haida ma Iesu ese ia hanamoa

7 Iesu mai ena diba tahua taudia danu Galilea kone dekenai idia lao, vadaeni Galilea bona Iudea taudia momo herea be iena murinai idia raka. 8 Momo herea Iesu ena kara sivarai idia kamonai, bona idia mai ia dekenai. Idia mai Ierusalema, Idumea, Ioridane unai kahana, Turo bona Sidono kahana dekena amo. 9 Iesu ese iena diba tahua taudia ia hamaoroa vanagi ta idia abia mai, inai taunimanima momo ese iena gaukara dalana idia koua garina. 10 Badina be guna, gorere taudia momo ia hanamoa dainai, hari gorere taudia idauidau momo idia mai ia kahirakahira, ia dekenai idia kamokau totona. 11 Lauma dikadia ese Iesu idia itaia neganai, idia moru diho, idia boiboi, idia gwau, “Oi be Dirava ena Natuna.”

12 Bona Iesu ese idia ia gwau henia, iena ladana idia hedinaraia lasi.

Diba tahua taudia 12 Iesu ese ia abia hidi

13 Iesu ia daekau ororo dekenai. Unuseni, ia ura henia taudia ia boiria, bona idia mai ia dekenai. 14 Bona taudia 12 ia abia hidi, ia dekenai dohore idia noho totona. Ia ese idia do ia siaia, haroro idia karaia totona. 15 Bona lauma dikadia lulua siahu ia henia idia dekenai.

16 Taudia be inai: Simona dekenai ladana matamata ia henia, Petero, 17 Iamesi, Sebedeo ena natuna, bona iena tadina Ioane dekenai ladana matamata ia henia, ladana be Boanere, anina be, “Guba boiboi natudia,” 18 Andrea, bona Filipo, bona Batolomeo, bona Mataio, bona Toma, bona Iamesi, Alepeo ena natuna, bona Tadeo, bona Roma taudia lulua gwauraia orea ena tauna ta ladana Simona, 19 bona Iuda Iskariote, Iesu ia samania tauna.

Taravatu hadibaia taudia idia badu Iesu dekenai

20 Iesu ia lao ruma dekenai. Ia bona iena diba tahua taudia idia ura aniani, to taunimanima momo idia haboua lou dainai, idia be aniani dala lasi. 21 Iesu ena varavara ese Iesu ena kara sivarai idia kamonai neganai, idia lao, ia abia bona naria totona, badina haida idia gwau ia kavakava.

22 Taravatu hadibaia taudia idia mai Ierusalema dekena amo, idia gwau, “Belesebulo ia noho ia lalonai,” bona, “Lauma dikadia edia biaguna ena siahu dekenai ia ese lauma dikadia taunimanima dekena amo ia lulua.”

23 Vadaeni Iesu ese taunimanima ia boiridia idia mai ia dekenai, bona parabole dekenai ia hereva idia dekenai. Ia gwau, “Edena bamona Satani sibona ese Satani do ia lulua? 24 Bema gavamani ta taudia idia parara bona heai momo, dohore unai gavamani ia gini diba lasi. 25 Bema iduhu ta taudia idia parara bona heai momo, unai iduhu ia gini diba lasi. 26 Bema Satani sibona ena lalona dekenai ia heai, bona sibona ia parara, dohore ia noho diba lasi, ena dokona be kahirakahira.

27 “Henaoa tauna be ia hegeregere lasi goada tauna ena ruma ia vareai. To bema goada tauna ia kwatua guna, vadaeni, unai neganai ia hegeregere kohu henaoa.

28 “Momokani lau hamaoroa umui dekenai, Dirava ese taunimanima edia kara dika ibounai ia gwauatao diba, bona Dirava ena ladana hadikaia hereva danu. 29 To, bema tau ta ese Lauma Helaga ena ladana ia hadikaia, Dirava ese unai dika be do ia gwauatao lasi. Iena dika be ia noho hanaihanai, kokia dalana be lasi.” 30 Iesu ese inai bamona ia hereva, badina be idia gwau lauma dikana ia noho ia lalonai.

Iesu ena varavara korikori

31 Iesu ena tadina bona iena sinana idia mai, murimuri dekenai idia gini. Hereva idia siaia, idia ura itaia. 32 Taunimanima momo be Iesu kahirakahira idia helai, idia gwau, “Oiemu sinana bona tadina bona taihuna idia noho murimuri dekenai, idia tahua oi.”

33 Iesu ia haere henia, “Lauegu sinana bona tadina be daika?” 34 Iena matana ia negea unuseni helai taudia dekenai, ia gwau: “Lauegu sinana bona lauegu tadina be inai. 35 Dirava ena ura idia karaia taudia, unai taudia be lauegu tadina, bona lauegu taihuna, bona lauegu sinana.”